Eerste Jaars Konsert

Die jaar het afgeskop met die Eerste Jaars konsert waarvan u seker teen die tyd al van gehoor het. Ons is almal vermaak deur die doenighede van die diereryk se nuwe regering. Byvoorbeeld ou jakkals wat fondse vaslê om vir hom 'n nuwe Mercedes SLK te koop en die ou regering wat klink asof almal verslaaf is aan Valiums en Brooklax. Maar die kersie op die koek was die goedgesinde tronkbewaarder wat die gevangenis bussie se sleutel vir die bandiere gee sodat hulle kan gaan fliek en nog voor twaalf sal terug wees(Ja reg !!). Oppierif se danspassies en liedjies was nogal baie soos Lionking sin, maar daar was een verskil. Die hoendervleis aanval aan die begin van die opvoering was so erg dat heelwat mense met 'n "rash" rondgeloop het vir 'n week.

Ipi Tombi Fees 

Hierdie jaar was die eerste keer wat Ipi Tombi fees by RAU aangebied is om die leemte in die bemarking van die Afrika kultuur te vul. Al die koshuise asook die daghuise het deelgeneem en daar was ook twee gabbas wat die Studente dorp verteenwoordig het. Die fees was 'n genotsame voorstelling van die kultuur wat nou kop uit steek in Suid-Afrika wat 'n mengsel van die swart en wit kulture is. Die aand het afgeslaan met die Epitombi dansgroep wat die gehoor vermaak het vir meer as 'n uur met hul kleurvolle en gesogde opvoering van die Afrika kultuur. Hul "drummer" moes net ongelukkig heeltyd sy stokkies aan die anderkant van die verhoog gaan haal elke vyf minute as hy dit verloor. Van al die huise wat deelgeneem het was daar net drie huise wat noemenswaardig was. Hulle was Benjimein Dameshuis, Drommedarus Manskoshuis en Oppierif Manskoshuis. Soos gewoonlik was Benjimein se opvoering se choriografie puik, maar daar was nie veel van 'n storie nie - wat verwag jy van 'n kudde Optom studente? Drommedarus het duidelik saam met die Titanic gesink en al wat oorgebly het was Oppierif wat oppiebol was. Dit was alle te danke aan ons eie Direktuer Fanie Rossouw en sy trawant Direkteur Phillip van der Merwe(Die 1.8 pond baba met runderpes). Henry met sy hoenderborsie en stem wat skrik vir niks het die hoofrol vertolk en daar was glad nie 'n tekort aan drama, skiet skop en #@#$*#@ nie en moet ook nie die liefde vergeet vir Mama Thembo nie.

Sangfees '98

Die Sangfees is hierdie jaar saam met Benjimein Dameshuis gehou. Ongelukkig, soos gewoonlik was die mos nou weer so preuts dat daar nie 'n sangfees kamp soos vorige jare gehou is nie. Die tema hierdie jaar was Babes en Bullets, 'n stuk wat gehandel het oor Patricia die hoer en die cowboy wat die liefde in haar lewe was. Snaaks genoeg het ons cow boy met 'n duitse aksent gesing. Die twee huise het geen besparings gemaak op die dekor en kostuums nie, en so paar weke later het Oppierif 'n nuwe kroeg en drank kabinet ! Ons het 3 van die 5 bekers gewen en algeheel tweede gekom tot ons spyte. Miskien moes ons net nie so 'n lelike prostituut gebruik het nie ?

RAU Koor

Oppierif het hierdie jaar, net soos vorige jare, 'n groepie manne wat almal klink asof hulle vir skaapwagters in die veld kan gaan sing. Maar ongelukkig het die RAU koor oudisies die manne eerste opgespoor. Daar kan met mening gesê word dat die RAU koor 'n redelike sterk verteenwoordiging van riwwers het. U moet maar self die koor optredes gaan besoek om te sien en hoor wat se kwaliteit Oppierif gee.

Oppierif Simfo '98

Die Oppierif Simfo het weereens soos vorige jare 'n puik uitdraai gehad deurdat almal wat iemand is by die geleentheid is. Snaaks genoeg is Oppierif die enigste koshuis in Suid-Afrika wat so iets aanbied, wat net weereens on uniekheid uitwys. Vir die dames daarbuite is dit maar net weer 'n teken dat mans tog kultuur in hul bloed het. Die Johannesburgse Simfonie orkes het soos vorige jare, 'n puik vertoning gelewer wat die pols op hol gejaag het. Na die simfonie is die huis lede weer met benying aangestaar.

Kunsmuur

Dit was net te moeilik om hierdie jaar te verbeter op verlede jaar se eerste plek. Johan van Loggerenberg het soos voorheen 'n puik stuk gedoen wat die asem laat wegslaan het. As jy ooit in die RAU biblioteek kom, kan jy maar gerus gaan kyk na die skouspel

Send mail to [email protected] with technical questions or comments about this web site.
Last modified: October 13, 1998